Sólbergið stimplaði sig inn

Sólbergið frá Ólafsfirði stimplaði sig rækilega inn á fyrsta heila árinu sem skipið var gert út. Alls var afli þessa nýja frystiskips Ramma hf. 12.450 tonn af óslægðum fiski og aflaverðmætið um 3,8 milljarðar króna.

Ólafur Marteinsson, framkvæmdastjóri Ramma, segir að útgerð Sólbergsins hafi nokkurn veginn gengið samkvæmt áætlun. Galli í togvindum hafi þó sett strik í reikninginn og þannig hafi gengið illa að veiða grálúðu þar til langt var liðið á árið.

Guðmundur í Nesi, frystiskip Útgerðarfélags Reykjavíkur, fiskaði fyrir rúmlega þrjá milljarða á árinu. Líklegt er að skipið verði selt til Arctic Prime Fisheries í Gænlandi, að því er fram kemur í umfjöllun um aflabrögðin í Morgunblaðinu í dag.