Þrjú skip leita loðnu í ársbyrjun

Tvö veiðiskip halda til loðnuleitar 4. eða 5. janúar og rannsóknaskipið Árni Friðriksson mánudaginn 7. janúar. Börkur NK heldur væntanlega frá Neskaupstað og Aðalsteinn Jónsson SU frá Eskifirði og hefja skipin leit fyrir austan land.

Í Morgunblaðinu í dag segir að rannsóknaskipið hefji leitina fyrir vestan og leitar austur á bóginn. Þorsteinn Sigurðsson, sviðsstjóri uppsjávarsviðs Hafrannsóknastofnunar, segir að til að byrja með verði þessi þrjú skip við leit, en hugsanlega bætist Ásgrímur Halldórsson SF frá Hornafirði við.

Starfsfólk frá Hafrannsóknastofnun verður um borð í veiðiskipunum, sem eru meðal þeirra stærstu í flotanum. Þorsteinn segir að spennandi verði að fara í loðnuleiðangur á Aðalsteini, en skipið var áður gert út frá Noregi og bar þá nafnið Libas. Það er vel tækjum búið, meðal annars til hafrannsókna, og notaði norska hafrannsóknastofnunin skipið mikið til rannsókna.