Laxeldisfyrirtækin Arnarlax og Arctic Sea Farm hafa fengið ASC-umhverfisvottun á framleiðslu sína. Um er að ræða eina ströngustu umhverfisvottunina þegar kemur að fiskeldi og er hún þekkt um allan heim, að því er segir í sameiginlegri tilkynningu fyrirtækjanna.

Bent er á að allur lax sem framleiddur verði á Vestfjörðum á þessu ári verði vottaður með þessum hætti, en bæði Arnarlax og Arctic Sea Farm eru staðsett á Vestfjörðum.

Hliðstæð MSC-staðlinum

„Við erum mjög ánægð með að vera komin með ASC-umhverfisvottun. Þetta undirstrikar markmið okkar um að stunda fiskeldi á sjálfbæran hátt í sátt við náttúru og samfélag,“ segir Kristian Mattiasson, framkvæmdastjóri Arnarlax, í tilkynningunni.

Fram kemur að ASC-vottunarstaðallinn hafi meðal annars verið þróaður af náttúruverndarsamtökunum World Wildlife Fund ásamt fiskeldisfyrirtækjum, en til að fá vottun þurfi fyrirtækin meðal annars að lágmarka umhverfisáhrif og starfa í sátt við samfélag og umhverfi.

ASC-vottun sé enn fremur hliðstæð MSC-staðlinum, sem sé þekktasti umhverfisstaðallinn fyrir sjávarafurðir, en ASC-staðallinn sé aðlagaður eldisafurðum. ASC-samtökin sem að baki staðlinum standa séu þá ekki rekin í hagnaðarskyni og séu óháð samtök.

Forsvarsmenn beggja fyrirtækja segjast ánægðir með að hafa staðist skilyrði vottunarinnar. Ljósmynd/Arctic Sea Farm

Lágmarki áhrif á umhverfið

„ASC-vottunin hefur mikla þýðingu fyrir okkur þar sem okkar viðskiptavinir horfa töluvert til umhverfisáhrifa og gera kröfur í þeim efnum. Við teljum að þessi áhersla á umhverfismál skili okkur ákveðnu samkeppnisforskoti til lengri tíma,“ segir Stein Ove Tveiten, framkvæmdastjóri Arctic Sea Farm.

Fyrirtæki sem standast ASC-vottun skuldbinda sig að lágmarka áhrif á umhverfið á ýmsa vegu. Taka þarf tillit til villtra laxfiskstofna, fugla, sjávarspendýra og annarra lífvera sem búa í námunda við eldissvæðin.

Svissneska vottunarfyrirtækið Bio Inspecta sá um ASC-úttekt Arnarlax. „Það er ánægjulegt að búið sé að taka út eldissvæði Arnarlax við Haganes og Steinanes og að fiskur af þessum eldissvæðum sé vottaður. Núna getur Arnarlax boðið viðskiptavinum upp á lax sem er alinn á sjálfbæran og skynsamlegan hátt,“ segir Roger Benz, gæðastjóri Bio Inspecta.

Tengdar fréttir

Fiskeldi

Arnarlax brýtur 100 þúsund tonna múrinn

• Slátrað úr kvíum við Haukadalsbót
• Fordæmalaus andstaða ekki í vegi eldis
• Sveiflukennt ár fyrir laxeldið
• Fyrstu seiðin komin í Viðlagafjöru

» Fleiri tengdar fréttir

• Blogga um frétt