Aflinn jókst um 82 þúsund tonn milli ára

Afli íslenskra skipa var rúm 1.259 þúsund tonn á árinu 2018, eða 82 þúsund tonnum meiri en landað var árið 2017. Þetta sýna bráðabirgðatölur Hagstofunnar.

Fram kemur á vef stofnunarinnar að aukið aflamagn á milli ára megi rekja til meiri botnfisks- og kolmunnaafla, og bent á að tæp 293 þúsund tonn hafi veiðst af kolmunna samanborið við 229 þúsund tonn árið 2017.

Botnfiskafli nam tæpum 481 þúsund tonnum á síðasta ári, eða 12% meira en árið 2017. Tæp 275 þúsund tonn veiddust þá af þorski á síðasta ári, sem er 9% aukning frá árinu 2017. Flatfiskaflinn jókst um 24% milli ára og var rúmlega 27 þúsund tonn á síðasta ári. Afli skel- og krabbadýra jókst um 20%, úr 10,4 þúsund tonnum árið 2017 í 12,5 þúsund tonn árið 2018, að því er fram kemur á vef Hagstofunnar.

Samdráttur í desember

Í desember var fiskaflinn tæp 57 þúsund tonn, sem er 19% samdráttur miðað við desember 2017. Þorskafli í desember var 15% minni en árið áður auk þess sem uppsjávarafli dróst saman um 23%. Aflinn í desember metinn á föstu verði var 16,5% minni en í desember 2017.

• Blogga um frétt