Ekki bjartsýni á upphafskvóta

Loðnuleiðangur Hafrannsóknastofnunar í samstarfi við útgerðir uppsjávarskipa er langt kominn og er búist við niðurstöðum undir lok vikunnar.

Samkvæmt heimildum Morgunblaðsins gefa mælingar í leiðangrinum fram til þessa ekki tilefni til að upphafskvóti verði gefinn út.

Í leiðangri í haust fannst ekki nægilegt magn til að gefa út upphafskvóta og sama var upp á teningnum í leiðangri Heimaeyjar VE skömmu fyrir jól. Útgerðarmaður sem rætt var við í gær sagði að ef þetta yrði einnig niðurstaðan í yfirstandandi leiðangri væri ekki annað í stöðunni en að halda áfram og fara fljótlega aftur til leitar.