ÚR kærir sviptingu veiðileyfis

Útgerðarfélag Reykjavíkur (ÚR) hefur kært ákvörðun Fiskistofu frá 2. janúar sl. um að svipta togarann Kleifaberg RE 70 veiðileyfi í tólf vikur frá og með 4. febrúar næstkomandi.

Kæran var send atvinnuvega- og nýsköpunarráðuneytinu og fer ÚR fram á að ráðuneytið felli ákvörðun Fiskistofu úr gildi, að því er fram kemur í umfjöllun um mál þetta í Morgunblaðinu í dag.

Í kærunni segir meðal annars að svipting veiðileyfis sé alvarleg ákvörðun sem valda muni verulegu tjóni. Hún sé ekki í neinu samræmi við hin meintu brot. Tjónið sé meira en áður hefur hlotist af stjórnvaldssektum og sérstaklega mikið vegna þess að það falli á þann árstíma sem skipið aflar að jafnaði þriðjungs tekna sinna.