Ráðgátan virðist vera leyst

Ráðgátan um uppruna þorsks sem veiddist við Jan Mayen síðasta sumar virðist vera leyst. Samkvæmt rannsóknum sérfræðinga Hafrannsóknastofnunar í Noregi er líklegast að um blandaðan afla sé að ræða, meirihlutinn sé kominn úr Barentshafinu, en um þriðjungur frá Íslandi. Niðurstöður bendi ekki til að um sérstakan Jan Mayen-stofn sé að ræða.

Er skipverjar á norska línuskipinu Loran voru á grálúðuveiðum við Jan Mayen í fyrrasumar fengu þeir óvænt góðan þorskafla á talsverðu dýpi og á svæði sem ekki er þekkt fyrir mikla þorskgengd. Vangaveltur voru um uppruna fisksins og fengu norskir sérfræðingar kvarnir og erfðaefni úr þorski frá Íslandi.

Frétt af mbl.is

Jan Mayen-þorskur líklega frá Íslandi

Guðmundur Þórðarson, sviðsstjóri botnsjávarlífríkis á Hafrannsóknastofnun, segir Norðmenn hyggjast kanna þorsk á þessum slóðum betur næsta sumar. Meðal annars verði kannað hvort þarna eigi sér stað einhver hrygning og einhver blöndun þorskstofna þó svo að þess hafi ekki orðið vart í rannsóknum á afla Lorans síðasta sumar.

Fjallað er nánar um málið í Morgunblaðinu í dag.