Klekst út, vex og dafnar við Ísland

Makríll klekst út, vex og dafnar á íslensku hafsvæði. Sýnt hefur verið fram á þetta í fyrsta skipti í nýrri rannsókn Hafrannsóknastofnunar og Háskóla Íslands.

Greint er frá niðurstöðum rannsóknarinnar á vef stofnunarinnar, en þar segir að þrátt fyrir þessa staðreynd sé vissulega aðeins um lítið brot af heildarhrygningu makríls að ræða.

Á undanförnum árum hafi makríll gengið bæði norðar og vestar en áður. Samfara þeirri þróun hafi útbreiðsla og magn makríls á Íslandsmiðum aukist verulega, sem talið er að tengist hlýnun sjávar og þéttleikaháðum áhrifum samfara stækkun stofnsins.

Nær hámarki í apríl-maí

„Beinar veiðar hófust hér við land árið 2007. Makríllinn byrjar að hrygna í febrúar við strendur Spánar og Portúgals og síðan flyst hrygningin smám saman norður með Evrópu fram á vor með hækkandi hitastigi,“ segir á vef stofnunarinnar.

„Hrygningin nær venjulega hámarki í apríl-maí úti fyrir vesturströnd Írlands og suðvesturströnd Englands, en á sama tíma er töluverð en dreifðari hrygning allt frá Biscayaflóa og norður fyrir Færeyjar. Á nyrstu svæðunum hefst hrygningin seinna og stendur fram í júlí. Frá árinu 2004 hefur orðið vart við makrílungviði við Suður- og Vesturströnd Íslands.“

Makrílseiðin aldursgreind

Í rannsókninni var stuðst við niðurstöður úr fjölþjóðlegum rannsóknarleiðöngrum á vegum Alþjóðahafrannsóknaráðsins (ICES), á hrygningu makríls í Norðaustur-Atlantshafi árin 2010 og 2013.

„Hafstraumar við suðurströnd landsins voru kortlagðir með aðstoð hafstraumalíkansins CODE sem þróað hefur verið við Háskóla Íslands. Makrílseiði af Íslandsmiðum voru aldursgreind og líkt var eftir reki ungviðis frá veiðisvæði að klak- og hrygningarsvæði með því að reikna út rek með straumum aftur á bak í tíma. Þannig voru, ásamt fyrirliggjandi upplýsingum um hrygningu makríls við Ísland, leiddar líkur að því hvar makrílungviðið klaktist út.“

• Blogga um frétt