Full afköst undanfarið hjá Hólmadrangi

Rækjuvinnslan Hólmadrangur á Hólmavík hefur farið fram á framlengda greiðslustöðvun til næstu þriggja mánaða. Á kröfuhafafundi í vikunni var ekki gerð athugasemd við þá tilhögun og segist Viktoría Rán Ólafsdóttir, stjórnarformaður Hólmadrangs og kaupfélagssstjóri Kaupfélags Steingrímsfjarðar, gera sér vonir um að dómstjóri samþykki framlengda greiðslustöðvun í dag.

Upphaflega fékk fyrirtækið þriggja vikna greiðslustöðvun í október og var hún síðan framlengd um þrjá mánuði í lok þess mánaðar. Verði greiðslustöðvun samþykkt í þrjá mánuði til viðbótar rennur hún út í lok apríl.

Viktoría segir að með ágætu samstarfi við Arion banka hafi vinnslan verið keyrð á fullum afköstum í verktöku og vel hafi gengið að greiða niður afurðalán til bankans.