Niðurstaðan mikil vonbrigði

MSC-vottanir fyrir makrílveiðar í Norðaustur-Atlantshafi verða afturkallaðar laugardaginn 2. mars. Gísli Gíslason svæðisstjóri MSC í Norður-Atlantshafi segir að niðurstaðan sé mikil vonbrigði.

Fram kemur í tilkynningu frá MSC að makríll sem veiddur verður 2. mars eða síðar verði ekki hægt að selja sem MSC-vottaðan, né heldur geti hann borið umhverfismerki MSC.

Afturköllunin tekur til fjögurra fiskveiðivottorða fyrir útgerðir í átta löndum, og kemur í kjölfar þess að makrílstofninn í norðaustanverðu Atlantshafi fór niður fyrir aðgerðarmörk, en heildarveiði hefur verið umfram vísindalega ráðgjöf.

Hagsmunaaðilar leggi fram áætlun

Þessi minnkun stofnsins leiddi til aukúttektar hjá vottunarstofunum í nóvember 2018 og skýrslur þeirra um afturköllun vottunar voru birtar í gær.

„Þessi niðurstaða er mikil vonbrigði,“ segir Gísli. „En nokkrir þættir eins og minnkandi stofn, heildarveiðikvótar umfram vísindalega ráðgjöf og lítil nýliðun gera það að verkum að fiskveiðarnar standast ekki lengur kröfur MSC-staðlana um sjálfbærar veiðar,“ bætir hann við.

„Að því sögðu treysti ég því að hagsmunaaðilar leggi fram áætlun um úrbætur í þessum efnum. Það er stöðugt unnið að því að endurskoða hvernig makrílstofnarnir eru metnir. Nokkrir skirteinishafar hafa nú þegar staðfest að þeir ætli að vinna að viðeigandi aðgerðum til að flýta fyrir því að stofninn nái sér á ný. Gangi það eftir þá geta vottunarstofur hugsanlega gefið aftur út MSC-skírteini fyrir þessar veiðar í náinni framtíð.“

Fiskveiðar sem afturköllunin nær til:

• ISF-veiðar á Íslendinga á makríl
• Faroese Pelagic Organisation veiðar á makríl í Norðaustur-Atlantshafi
• NIPSG (Northern Ireland Pelagic Sustainability Group), veiðar Norður Íra á makríl
• MINSA sameiginlegt fiskveiðiskírteini á makríl í Norðaustur-Atlantshafi fyrir:

1. Danmörk DPPO (Danish Pelagic Producers Organization)
2. Írland IPSA (Irish Pelagic Sustainability Association)
3. Írland IPSG (Irish Pelagic Sustainability Group)
4. Holland PFA (Pelagic Freezer-trawler Association)
5. Noregur NFA (Norges Fiskarlag/Norwegian Fishermen’s Association)
6. Svíþjóð SPFPO (Swedish Pelagic Federation Producers Organisation)
7. Bretland SPSG (Scottish Pelagic Sustainability Group)

• Blogga um frétt