Samningur við Breta endurnýjaður

Georg Kr. Lárusson, forstjóri Landhelgisgæslunnar og Tim Lowe, aðmíráll og yfirmaður UKHO, bresku sjómælinganna, hafa skrifað undir endurnýjaðan tvíhliða samning um áframhaldandi samstarf á sviði sjókortagerðar.

Samningurinn tekur meðal annars á skiptum á upplýsingum og reynslu er snýr að útgáfu sjókorta, að því er fram kemur í tilkynningu frá Landhelgisgæslunni. Segir í henni að markmiðið með samningnum sé einnig að auka öryggi sjófarenda og verndun umhverfisins.

Landhelgisgæslan og UKHO hafi átt í nánu samstarfi á þessu sviði í ríflega tvo áratugi, sem meðal annars hafi snúið að þjálfun starfsmanna Landhelgisgæslunnar, samskiptum við þriðja aðila er lýtur að höfundarréttarmálum og dreifingu á rafrænum sjókortum.

• Blogga um frétt