Bæta úr ágöllum á umhverfismati

Arnarlax og Arctic Fish hafa kynnt viðbót við frummatsskýrslu vegna umhverfisáhrifa aukningar laxeldis í sjókvíum í Patreksfirði og Tálknafirði.

Skýrslunni er ætlað að bæta úr þeim annmörkum sem úrskurðarnefnd umhverfis- og auðlindamála taldi vera á umhverfismati framkvæmdarinnar. Varð það til þess að rekstrar- og starfsleyfi fyrirtækjanna voru felld úr gildi.

Fyrirtækin fengu rekstrar- og starfsleyfi til bráðabirgða hjá viðkomandi ráðuneytum í vetur, eftir að lögum var breytt í kjölfar úrskurðar. Úrskurðarnefndin taldi að ekki hefði verið gerð nægilega góð grein fyrir öðrum kostum en þeim sem fyrirtækin völdu. Í viðbótarskýrslunni er staðsetningu kvía breytt, með tilliti til nýrrar tækni og þekkingar og til að draga úr neikvæðum áhrifum laxeldisins, að því er fram kemur í Morgunblaðinu í dag.