Fjögur skip í flutningaskipi frá Víetnam til Noregs

Smíði á fjórum togskipum sem Vard-skipasmíðastöðin er að smíða fyrir Gjögur hf. og Skinney-Þinganes í Víetnam hefur gengið vel.

Skipin verða sjósett í þessum mánuði og í framhaldinu verða þau sett um borð í flutningaskip og flutt frá Vung Tau, skammt frá Ho Chi Minh-borg, áður Saigon, til Noregs þar sem smíði skipanna verður lokið.

Skipin fjögur eru hluti af sjö skipa raðsmíðaverkefni sem íslensk útgerðarfyrirtæki sömdu um við Vard, sem rekur m.a. skipasmíðastöðvar í Noregi, Rúmeníu og Brasilíu, auk Víetnams. Auk Gjögurs og Skinneyjar-Þinganess er verið að smíða tvö skip fyrir Berg-Hugin, dótturfélag Síldarvinnslunnar, og eitt fyrir Útgerðarfélag Akureyringa. Síðarnefndu skipin þrjú verða að öllu leyti smíðuð í Noregi, en öll á að afhenda skipin á þessu ári.