Loðnuleit verður haldið áfram norður með Austfjörðum og vestur með Norðurlandi næstu daga. Áætlað var að rannsóknaskipið Árni Friðriksson og Polar Amaroq héldu úr höfn í gærkvöldi, en þriðja leitarskipið, Ásgrímur Halldórsson SF, var austur af Langanesi síðdegis í gær.

Norsku skipin Roaldsen og Akeröy tóku þátt í leitinni fyrir austan um helgina, en þátttöku þeirra er lokið.

Að sögn Þorsteins Sigurðssonar, sviðsstjóra uppsjávarsviðs á Hafrannsóknastofnun, hefur verið farið yfir stórt svæði úti fyrir Suðaustur- og Austurlandi síðustu daga og fimm skip tekið þátt. Loðnan hefði verið mjög dreifð, í raun hefði ekkert bæst við frá fyrri mælingum og niðurstaðan gæfi ekki tilefni til að leggja til veiðikvóta.

Útgerðarmaður sem rætt var við í gær sagði að helsta vonin fælist í því að nægjanlegt magn fyndist fyrir Norðurlandi, en hluti loðnunnar hefur hrygnt þar síðustu ár. Þar fékk Hoffellið tvívegis góðan afla eftir miðjan mars síðasta vetur.

Tengdar fréttir

Loðnuveiðar

Loðnubrestur veldur ugg á Hornafirði

• Loðnubrestur algengur í Barentshafi
• Tímabært að rannsaka afrán hvala
• Loðnubrestur dregur verulega úr hagvexti
• „Enginn talar um hið augljósa“

» Fleiri tengdar fréttir