Kaupir helmingshlut í Sea Data Center

Norska hugbúnaðarfyrirtækið Maritech hefur keypt um helmingshlut í íslenska sprotafyrirtækinu Sea Data Center. Fyrirtækin hafa gert með sér samstarfssamning um áframhaldandi þróun á búnaði og mun Sea Data Center verða umboðsaðili Maritech á Íslandi.

„Rannsóknir á nákvæmum markaðsupplýsingum og framboðsþróun sjávarafurða krefjast flókinna tæknilegra úrlausna,“ segir Janne T. Morstøl, forstjóri Maritech. „Með samstarfinu við Sea Data Center, erum við bæði að samtvinna tæknilausnir og auka þjónustu okkar á Íslandi í gegnum Sea Data Center sem verður umboðsaðili okkar. Með okkar einstöku tækni og gagnagrunni getum við aðstoðað viðskiptavini okkar með hagræðingar í rekstri, áhættustýringu og rekstrarákvarðanir,“ er haft eftir forstjóranum í tilkynningu.

Með sameinaðri tækni og gagnagrunni Maritech og Sea Data Center muni þannig verða til hátæknileg greiningartækni fyrir viðskipti með sjávarafurðir sem sé einstök á markaðnum, og muni veita viðskiptavinum aðgengi að rauntíma upplýsingum í sjávarútvegi.

„Með því sameina gögn um löndunar-, viðskipta- og neytendavísitölu með eigin gögnum munu viðskiptavinir okkar geta séð og skilið raunveruleg verðmæti afurða sinna í samanburði við alþjóðlegar markaðsaðstæður. Sölukerfið greinir nýjar vörur, markaði og tækifæri, allt í einu kerfi,“ segir Morstøl.