Tíu bátar á leiðinni frá Trefjum

Skipasmíðastöðin Trefjar í Hafnarfirði hefur afhent kaupendum tvo nýja báta frá áramótum. Fór annar til Noregs og hinn til Skotlands. Alls eru tíu bátar í smíðum hjá skipasmíðastöðinni núna, segir Högni Bergþórsson, tækni- og markaðsstjóri Trefja.

Bátar Trefja eru allt frá 9,5 til 15 metrar að lengd og því tekur smíði hvers báts mislangan tíma, eftir stærðinni.

„Einn af þessum stærstu er kannski á við eins og sex af þessum minnstu,“ segir Högni í samtali við 200 mílur og bætir við að á undanförnum misserum hafi Trefjar gengið frá smíðum á um það bil einum báti í hverjum mánuði.

Engin smíði er í gangi fyrir innanlandsmarkað en þeim mun fleiri verkefni eru sótt út fyrir landsteinana að sögn Högna, þar sem Trefjar hafa komið ár sinni vel fyrir borð á undanförnum árum.

Gott orðspor skili verkefnum

„Staðan er góð víða erlendis, þar sem við höfum reynt að markaðssetja okkur í gegnum árin. Við erum aðallega að selja báta til Bretlandseyja, Noregs og Frakklands. Svo er einstaka bátur sem fer til Grænlands. Við höfum enda lagt áherslu á löndin sem eru okkur næst.“

Spurður hvernig litlar útgerðir í þessum löndum komist í kynni við bátasmíðastöð í Hafnarfirði segir hann að langan tíma hafi tekið að byggja upp viðskiptasambönd og gott orðspor utan Íslands, sem sé að skila árangri núna.

„Við höfum kynnt okkur og tekið þátt í vörusýningum, og eftir atvikum sótt beint á útgerðirnar líka þar sem við höfum komist í tæri við þær. En ekki síður held ég að orðsporið okkar sé mjög gott – sem sést til dæmis þegar við seljum bát á eitt svæði og fáum í kjölfarið fyrirspurnir þaðan um smíði á fleiri bátum. Kaupendur bátanna okkar hafa þannig ýtt undir að aðrir hafi samband við okkur og kaupi af okkur báta.“

Hann tekur fram að fyrirtækið hafi lagt mikið upp úr að þjónusta vel þá sem kaupi bátana. „Ég hugsa að það sé lykilþáttur í þessu öllu saman, þó að auglýsingar í blöðum og fagtímaritum skili auðvitað sínu sömuleiðis.“

Viðtalið birtist í heild sinni í ViðskiptaMogganum 14. febrúar.