Um fimmtán manns verið sagt upp

Um fimmtán manns hefur þegar verið sagt upp vegna loðnubrests í Fjarðabyggð og laun starfsmanna í sjávarútvegi í sveitarfélaginu munu lækka um 13% á þessu ári ef fram fer sem horfir og aflabrestur verður í loðnu.

Þetta er niðurstaða greinargerðar fjármálastjóra Fjarðabyggðar sem kynnt var á fundi bæjarráðs sveitarfélagsins í morgun.

Kemur þar einnig fram að launatekjur íbúa í sveitarfélaginu muni lækka að óbreyttu um fimm prósent, eða 1,25 milljarða króna, á þessu ári. Ekki verði ráðið í ýmis tímabundin störf og að líkleg langtímaáhrif muni leiða til frekari fækkunar starfsfólks. Velta fyrirtækja sem séu beintengd þjónustu við sjávarútvegsfyrirtækin muni lækka um nær 600 milljónir króna.

Árni Friðriksson, skip Hafrannsóknastofnunar. Loðnu hefur verið leitað í margar vikur. mbl.is/Pétur Kristjánsson

40% af loðnuaflanum í Fjarðabyggð

„Samdráttarins mun gæta einnig í öðrum atvinnugreinum og smitast um samfélagið s.s. bjartsýni íbúa og fyrirtækja til fjárfestinga, viðhalds og annarra þjónustukaupa auk fasteignamarkaðar,“ segir í greinargerðinni.

Tekjur sveitarsjóðs og hafnarsjóðs muni lækka um 260 milljónir króna frá fjárhagsáætlun ársins 2019.

Að meðaltali hefur tæplega 40% af öllum loðnuafla síðustu 5 ára komið að landi í Fjarðabyggð. Mikilvægi loðnuveiða og -vinnslu er því gríðarlega mikið fyrir samfélagið. Útflutningsverðmæti loðnuafurða sem komu að landi í Fjarðabyggð nam um 10 milljörðum króna á árinu 2018.

Frétt af mbl.is

„Sá raunveruleiki sem við búum við“

• Blogga um frétt