Stormur á leið úr landi

Stormur Seafood hefur samið um sölu línu- og netaskipsins Storms HF til kanadísks útgerðarfélags. Kaupverðið er 14 milljónir evra, eða um 1,87 milljarðar króna.

Þetta staðfestir Steindór Sigurgeirsson, eigandi Storms Seafood, en segir að enn eigi eftir að tryggja fjármögnun kaupanna ytra. 

„Það er kominn kaupsamningur en það á eftir að hnýta nokkra lausa enda,“ segir hann í samtali við 200 mílur.

Skipið kom til Reykjavíkurhafnar í desember 2017 frá Gdansk í Póllandi, þar sem skrokk­ur­inn var lengd­ur úr 23 metrum í 45 metra. Út­gerðin hafði þá keypt skrokk­inn í Ný­fundna­landi nokkr­um árum áður.

Legið óhreyft í Reykjavíkurhöfn

Athygli vakti að skipið er „dísil-raf­knúið“ (e. diesel-electric) þar sem skrúfu­búnaður­inn er knú­inn af raf­mótor. Ork­an er feng­in með dísil-eldsneyti, sem dríf­ur raf­mótor­inn, en með þessu fyrirkomulagi mun orku­notk­un vera um helm­ingi minni en hjá sam­bæri­legu skipi.

Síðan hefur skipið hins vegar legið óhreyft í Reykjavíkurhöfn.

„Ég seldi kvótann og ákvað að hætta í útgerð og skipið hefur síðan þá verið til sölu. En skipið er æðislegt, frábært sjóskip í alla staði,“ segir Steindór.

Greint var fyrst frá sölu skipsins á vef Fiskifrétta.

Frétt af mbl.is

Fyrsta fiskiskipið til að hafa rafmótor

• Blogga um frétt