16 ára Íslendingur gerir út í Gildeskål í Noregi

Svanur Þór Jónsson, 16 ára íslenskur strákur, komst á síður Fiskeribladet sem er stærsta sjávarútvegsblað við norðurströnd Noregs þrátt fyrir að hafa einungis búið hálft ár í Noregi. Viðtalið var tekið í tilefni þess að Svanur Þór á og gerir sjálfur út sex metra Nyra-plastbát sem tekur hálft tonn af fiski.

„Ég fékk smábátaréttindi í sumar og ræ með skólanum. Ég keypti bátinn minn fyrir fjórum mánuðum en það hefur ekki gengið neitt svakalega vel í vetur. Fiskurinn er ekki kominn nógu nálægt landi og ég ræ bara innan fjarðar,“ segir Svanur Þór sem býr í Gildeskål sem er sveitarfélag sunnan við Bodø í fylkinu Norður-Noregi.

Svanur Þór, sem verður 17 ára í maí, stundar nám í sjávarútvegsfræði við framhaldsskólann í Meløy. Hann reiknar með að klára bóklegt nám við skólann á næsta ári og eftir það taki við eitt ár í starfsnámi.

Sjá viðtal við Svan Þór í heild á baksíðu Morgunblaðsins í gær.