Brestur í loðnuveiðum og blikur á lofti eru orð sem oft hafa verið notuð að undanförnu. Loðnan hefur breytt hegðan sinni síðustu ár og mörgum spurningum er ósvarað um umhverfisþætti, útbreiðslu, þróun stofnsins og göngur loðnunnar til hrygningar, sem að stærstum hluta hefur verið í Faxaflóa og Breiðafirði.

Einstaklingar, fyrirtæki og sveitarfélög víða um land þurfa að endurskoða fjárhagsstöðuna og komið hefur fram að loðnubresturinn sé mikið högg fyrir þjóðarbúið. Þannig geti ríkið orðið af um fjórum milljörðum ef miðað sé við vertíð eins og var í fyrra sem þó var ekki meðal þeirra stóru, að því er fram kemur í fréttaskýringu í Morgublaðinu í dag.

Mörg spjót hafa staðið á starfsmönnum Hafrannsóknastofnunar síðustu vikur, en þar stendur Þorsteinn Sigurðsson í brúnni á uppsjávarsviði. Hann segir að loðnan sem hrygnir fyrir Vesturlandi sé trúlega að mestu hrygnd, en hrygning fyrir norðan sé venjulega seinna á ferðinni. Þar virðist minna af loðnu ganga til hrygningar en síðustu tvö ár af fréttum að dæma. Fregnir hafi borist héðan og þaðan um loðnu, en Þorsteinn segir að það sé í samræmi við það sem menn hafi vitað og ekkert sem breyti fyrri ákvörðunum varðandi ráðgjöf um veiðar.

Mest af loðnunni hrygnir við þriggja ára aldur og drepst síðan að stórum hluta. Loðnubresturinn kom ekki með öllu á óvart því árgangurinn sem átti að bera uppi veiði vetrarins mældist lítill við mælingar þegar hann var mældur sem ungloðna í september 2017.

Tengdar fréttir

Loðnuveiðar

Kaupa norska loðnu á uppboði

• Árangurslausri loðnuleit formlega lokið
• Ekkert markvert fundist af loðnu
• Heimaey bættist í hóp leitarskipa
• Tvö skip leita nú loðnu suðaustur af landinu

» Fleiri tengdar fréttir