Aflaverðmæti jókst um 14,8% frá 2017

Aflaverðmæti úr sjó nam tæpum 126,3 milljörðum á síðasta ári og jókst um 14,8% frá árinu áður. Verðmæti botnfiskaflans nam 89 milljörðum og jókst um 16,9%, en þorskur er sem fyrr verðmætasta tegundin með aflaverðmæti upp á 55,8 milljarða og jókst það um 14,5% milli ára.

Þetta kemur fram á vef Hagstofunnar. Segir þar einnig að af öðrum botnfisktegunum hafi aflaverðmæti ýsu numið 10,6 milljörðum (+33,2% frá árinu 2017), karfa 10,2 milljörðum (+15,5%) og ufsa 7,9 milljörðum (+23,6%).

„Verðmæti uppsjávarafla var 24,4 milljarðar sem er 2,6% aukning frá fyrra ári. Aflaverðmæti flatfisks jókst um 35,6% á milli ára og var 10,2 milljarðar árið 2018. Verðmæti skel- og krabbadýraaflans nam 2,6 milljörðum á síðasta ári samanborið við 2,4 milljarða árið 2017,“ segir á vef Hagstofunnar.

„Verðmæti afla, sem seldur var til eigin vinnslu innanlands árið 2018, nam 70,8 milljörðum sem er um 56% af heildarverðmæti. Verðmæti sjófrysts afla nam 29,8 milljörðum og verðmæti afla, sem fór á fiskmarkaði til vinnslu innanlands , nam 19,5 milljörðum, eða um 15% af heildarverðmæti.

Í desember 2018 var aflaverðmæti 7,1 milljarður sem er 4,4% minna en í desember 2017. Samdráttur varð í öllum tegundaflokkum, aflaverðmæti botnfisks dróst saman um 2,3%, flatfisks um 14,4%, uppsjávartegundir um 13,1% og verðmæti skel- og krabbadýra var 24,2% lægra en árið 2017.“

• Blogga um frétt