„Vona að veiðin fari að hrökkva í gang“

„Við erum að vona að veiðin fari að hrökkva í gang og ýmislegt bendir til þess að það sé að gerast. Þegar við hófum veiðar á þriðjudag var sáralítið að hafa en nú fáum við 300 til 400 tonn í holi. Það er reyndar lengi togað en hvað sem því líður er aflinn að aukast.“

Þetta sagði Kristján Þorvarðarson, skipstjóri á Venusi NS, seinni partinn í gær en hann er með skipið á kolmunnaveiðum syðst í færeysku lögsögunni. Mikill fjöldi skipa er á þessum slóðum, að því er fram kemur á vef HB Granda.

„Skipin eru að minnsta kosti fjörutíu talsins. Hér er mikill fjöldi rússneskra skipa, örugglega sextán til sautján talsins, og svo eru hér færeysk skip og ætli það séu ekki komin átta til níu íslensk skip á veiðisvæðið. Norsku skipin og skip frá ríkjum ESB eru sunnar á svæðinu og í gær voru einhver skip að veiðum vestur af St. Kilda, eynni sem tilheyrir Skotlandi,“ segir Kristján en hann kveður kolmunnann ganga nokkuð hratt norðaustur eftir slóðinni.

„Þetta er finn fiskur af ágætri stærð en reyndar nokkuð magur eins og við er að búast á þessum árstíma.“

• Blogga um frétt