Tólf þúsund tonn á land og meira á leiðinni

Komin eru á land um tólf þúsund tonn af kolmunna í verksmiðjur Síldarvinnslunnar í Neskaupstað og á Seyðisfirði. Veiðin hefur verið þokkaleg að undanförnu og vinnsla gengið mjög vel.

Margrét EA kom til Seyðisfjarðar með tvö þúsund tonn 16. apríl og Bjarni Ólafsson AK með 1.700 tonn til viðbótar 18. apríl. Börkur NK kom síðan með rúmlega 2.100 tonn 20. apríl og fyrr í dag var unnið að því að landa 1.500 tonnum úr Hákoni EA.

Beitir NK kom til Neskaupstaðar með 3.200 tonn 20. apríl og Bjarni Ólafsson AK með 1.100 tonn í gærkvöldi. Polar Amaroq mun landa þar rúmlega 200 tonnum í kvöld, að því er fram kemur á vef Síldarvinnslunnar, en skipið kemur í land til að lagfæra veiðarfæri. Margrét EA er sömuleiðis á leiðinni með 2.000 tonn.

Að sögn Gunnars Sverrissonar verksmiðjustjóra á Seyðisfirði er kolmunninn fínt hráefni enda komi fiskurinn vel kældur úr skipunum. Á þessum árstíma sé kolmunninn þó ekki mjög feitur.

• Blogga um frétt