Finna kókaín í ferskvatnsrækjum

Vísindamenn hafa fundið vímuefni á borð við kókaín og ketamín í ferskvatnsrækjum þegar þeir athuga hvort ýmis efni sé að finna í ám og vötnum. Þeir segja þessa uppgötvun koma á óvart, en greint er frá henni á vef BBC.

Segir þar að rannsakendur við King's College í Lundúnum, í samstarfi við Suffolk-háskóla, hafi athugað efnasamsetningar í ám og vötnum á fimmtán mismunandi stöðum í Suffolk-sýslu. Kókaín fannst í þeim öllum.

Nic Bury, prófessor við Suffolk-háskóla, segir í samtali við BBC að eftir eigi að athuga hvort þetta ástand sé bundið við Suffolk eða sé einnig raunin annars staðar.

„Heilbrigði umhverfisins hefur fengið mikla athygli almennings vegna áskorana sem tengjast loftslagsbreytingum og örplastmengun. Hins vegar er þörf á að athuga mun betur áhrif ósýnilegrar efnamengunar, svo sem vegna lyfja, á lífríkið.“

Auk vímuefnanna fundust ólöglegar tegundir af skordýraeitri og leifar af ýmsum lyfjum í rækjunum. Að sögn vísindamannanna hafa efnin þó líklega lítil áhrif á þær.

• Blogga um frétt