Meint brot Hvals hf. áfram til rannsóknar

Ríkissaksóknari hefur fellt úr gildi ákvörðun lögreglustjórans á Vesturlandi um að hætta rannsókn er varðar meint brot Hvals hf. á ákvæðum reglugerðar um yfirbyggðan skurðarflöt og lagt fyrir að sá hluti kæru Jarðar verði tekinn til áframhaldandi rannsóknar.

Þetta kemur fram í ákvörðun ríkissaksóknara sem send var lögreglustjóranum á Vesturlandi og Ragnari Aðalsteinssyni, lögmanni Jarðarvina, 15. apríl og mbl.is hefur undir höndum.

Frétt af mbl.is

Leggja fram kæru á hendur Hval hf.

Málavextir eru með þeim hætti að ríkissaksóknara barst kæra Jarðarvina á hendur Hval hf. 10. ágúst 2018 og var kæran framsend til lögreglustjórans á Vesturlandi til viðeigandi meðferðar 13. ágúst, en kæran var í þremur liðum og varðaði veiði kærða á blendingshval, afkvæmi steypireyðar og langreyðar, vinnslu og verkun afurða og loks skutulbyssur.

Staðfesti ákvörðun lögreglustjórans að hluta

Lögreglustjórinn á Vesturlandi tilkynnti málsaðilum 21. desember 2018 að rannsókninni hefði verið hætt, en Jarðarvinir kærðu ákvörðun þá til ríkissaksóknara. Þá barst ríkissaksóknara jafnframt erindi frá kæranda um meinta vanrækslu á að dagbókum skipstjóra Hvals hf. sé skilað til Fiskistofu.

Ríkissaksóknari staðfesti ákvörðun lögreglustjórans á Vesturlandi um að hætta rannsókn á þeim hlutum málsins sem verða veiði á blendingshval og skutulbyssur Hvals hf., en felldi eins og fyrr segir úr gildi ákvörðun um að hætta rannsókn á ákvæðum reglugerðar um yfirbyggðan skurðarflöt.

Rannsaki vanrækslu á skilum dagbókar skipstjóra

Í ákvörðun ríkissaksóknara segir að kæra Matvælastofnunar sé ekki skilyrði til þess að meint brot á reglugerð nr. 489/2009 um yfirbyggðan skurðarflöt sæti rannsókn lögreglu. Tekur ríkissaksóknari undir röksemdir lögreglustjórans um að gæta þurfi meðalhófs, en telur engu að síður fullt tilefni til frekari gagnaöflunar í málinu. Í framhaldi þess verði hægt að meta hvort tilefni sé til enn frekari rannsóknar málsins eður ei.

Ríkissaksóknara barst 6. mars 2019 bréf frá Jarðarvinum þar sem þess er óskað að fram fari rannsókn á meintri vanrækslu á skyldu sem lögð er á í útgefnu leyfi Hvals hf. til veiða á langreyði 2014 til 2018 um skil á dagbók skipstjóra yfir veiðar til fiskistofu í lok vertíðar. Framsendi ríkissaksóknari lögreglustjóranum á Vesturlandi erindi Jarðarvina á meintri vanrækslu á skilum dagbókar skipstjóra til Fiskistofu.

• Blogga um frétt