Verður þjónustuskip í olíuiðnaði

Eftir áratugi við fiskveiðar á Íslandsmiðum mun Jökull ÞH 259 fá ný verkefni í Noregi, m.a. í þjónustu við olíuiðnaðinn í Norðursjó og lagningu sæstrengja milli norskra fjarða, samkvæmt upplýsingum Morgunblaðsins.

Þegar skipið kom til landsins 1964 bar það nafnið Súlan EA 300, en er það kom nýverið úr slipp mátti lesa nafnið Nord á síðunni og heimahöfn Grindavík. Íslenskir aðilar eru meðal kaupenda að Jökli, sem áður var í eigu GPG Seafood ehf.

Byggðarráð Norðurþings fjallaði um sölu skipsins 11. apríl og samþykkti að nýta ekki forkaupsrétt að skipinu. GPG Seafood ehf. keypti skipið 2010 og var það ýmist á trolli eða netum. Hörður Björnsson ÞH 260 leysti Jökul af hólmi 2015 og hefur skipið að mestu legið við bryggju á Húsavík síðan. Jökull kom blámálaður í slipp í Reykjavík á dögunum, en fór niður nokkrum dögum síðar í rauðum litum nýrra eigenda, að því er fram kemur í umfjöllun um skipið í Morgunblaðinu í dag.