Fiskeldisfyrirtækið Arctic Fish hefur hafið laxeldi í Patreksfirði, rúmu hálfu ári eftir að áformin komust í uppnám þegar úrskurðarnefnd umhverfis- og auðlindamála svipti fyrirtækið þeim rekstrar- og starfsleyfum sem tengdust eldinu.

Engin seiði voru komin í sjó þegar fyrirtækið var svipt leyfunum, en allt var þó til reiðu svo að hægt væri að hefja eldi, segir Sigurður Pétursson, framkvæmdastjóri viðskiptaþróunar hjá Arctic Fish.

„En í ljósi þeirrar óvissu sem fylgdi leyfissviptingunni þá ákváðum við að láta reyna á það að ala stærri fisk til útsetningar í sjó,“ segir hann í samtali við 200 mílur.

Fyrirtækin fengu síðar bráðabirgðaleyfi samkvæmt ákvörðun ráðherra, en það er fyrst nú sem seiðin fara loks í sjókvíarnar. Spurður hvenær megi því búast við að þessum fiskum verði slátrað segir Sigurður að slátrun gæti hafist fyrir lok næsta árs.

Sigurður segir að sér lítist vel á álit Skipulagsstofnunar.

Slátrun sex mánuðum fyrr?

„Yfirleitt eru fiskarnir um 24 mánuði í sjó en það stysta sem hefur liðið frá útsetningu til slátrunar eru um sextán til átján mánuðir. Nú gætum við verið að horfa fram á um fjórtán til sextán mánuði í sjó, þó þetta fari auðvitað að miklu leyti eftir Móður náttúru. Við gætum þannig ef til vill náð slátrun um sex mánuðum fyrr en ella.“

Fjórir Patreksfirðingar hafa verið ráðnir til starfa hjá Arctic Fish vegna eldisins í firðinum. Er heildarfjöldi starfsmanna fyrirtækisins á Vestfjörðum því kominn á sjötta tug.

„Atvinnuuppbyggingin hér fyrir vestan heldur því áfram.“

Skipulagsstofnun birti á mánudag álit sitt um áform Arctic Fish um framleiðsluaukningu í Patreksfirði og Tálknafirði. Segist stofnunin telja að efni séu til að kveða á um að aukningin verði framkvæmd í áföngum. Framleiðslan verði þannig aukin í skrefum og reynsla af starfseminni og niðurstöður vöktunar muni stýra ákvörðunum um að auka framleiðslu frekar.

Frétt af mbl.is

14.500 tonna aukning verði í áföngum

Inntur eftir viðbrögðum segir Sigurður að sér lítist vel á álitið. „Við erum sátt við þetta og þetta er í takti við þá vinnu sem við höfum verið að gera. Við höfum verið að byggja okkar eldi upp hægt og bítandi frá árinu 2009 og það er sú aðferð sem við teljum besta, svo að þetta álit rímar vel við okkar áform.“

Nánari umfjöllun birtist í ViðskiptaMogganum sem fylgdi Morgunblaðinu í gær, miðvikudag.

Tengdar fréttir

Fiskeldi

„Enginn flokkur tekið málið í fangið“

• Strokulaxar setja mark sitt á laxveiðiár
• Eldisrisi fjárfestir milljörðum í þekkingu
• 5.196 laxar hafi sloppið úr landeldisstöð
• Strokulöxum fækkar í norskum ám

» Fleiri tengdar fréttir