20 milljón máltíðir á dag

Kristján Þór Júlíusson, sjávarútvegs- og landbúnaðarráðherra, metur stöðu íslensks sjávarútvegs sterka um þessar mundir þrátt fyrir harða alþjóðlega samkeppni sem hann á við að etja.

Bendir hann á að það sé merkileg staðreynd að 350 þúsund manna þjóð standi að baki sjávarútvegi sem veiði fisk úr sjó sem sé undirstaða 20 milljón máltíða á degi hverjum.

Þetta kemur fram í viðtali við Kristján Þór í 200 mílum, sem fylgja Morgunblaðinu í dag í tilefni sjómannadagsins á morgun. Í viðtalinu bendir Kristján Þór á að helstu ógnirnar sem komið geti upp gagnvart atvinnugreininni séu átök hér innanlands, m.a. þau sem lúta að fiskveiðistjórnunarkerfinu og gjaldtöku af því. Hann telur þó að umræðan um fyrrnefnda atriðið sé komin í betra jafnvægi en áður var. Þá segir hann að umræðan um veiðigjöld eigi eftir að taka út sama „þroska“ á komandi árum og að það muni í kjölfarið tryggja meiri stöðugleika fyrir greinina.