Veðrið lék við gesti sjómannadagsins

Fjölmargir tóku þátt í Hátíð hafsins sem fram fór um helgina við hafnarsvæði höfuðborgarinnar. Gestir tóku þátt í skemmtilegum viðburðum og samglöddust sjómönnum á sjómannadeginum sem er í dag.

Hátíðarsvæðið náði frá Hörpu, um gömlu höfnina, út á Grandagarð og að HB Granda. Gestir tóku þátt í hinum ýmsu skipulögðu viðburðum og gátu allir fundið eitthvað við sitt hæfi. 

Veðrið lék við gesti og margir fræddust um fiskana í sjónum, kíktu um borð í varðskipið Óðin eða reyndu fyrir sér á svokölluðum standbrettum svo fátt eitt sé nefnt. 

Hápunkturinn sjómannadagsins var í dag þegar sjómenn voru heiðraðir á sviðinu í Grandagarði. 

Þeir sem standa að baki hátíðinni eru Faxaflóahafnir, Sjómannadagsráð og HB Grandi.