Sjóari með níu líf

Guðmundur R. Jónsson, nefndur Gassi, kallar ekki allt ömmu sína. Hann hefur lent í ýmsu til sjós og lands, nokkrum sinnum verið talinn af en ætíð vaknað aftur til lífsins.

Gassi var lengi sjómaður, lengst af á bátum sem gerðir voru út frá Grindavík. „Ég var alltaf á toppskipum,“ segir hann og minnist ánægjulegra tíma með úrvals mönnum á netabátum eins og Alberti, Arnfirðingi og Grindvíkingi. „Sá síðastnefndi var frægt aflaskip og við fiskuðum óhemju mikið,“ segir hann stoltur.

Hann var lengi á síld í Norðursjónum og við Nýfundnaland og þótti harður í horn að taka. „Ég slasaðist aldrei en eitt sinn, þegar ég var á Sigurfara frá Hornafirði, fórum við nær á hliðina með bátinn fullan af síld rétt utan við Garðskaga. Það var slembilukka að við fórum ekki niður en okkur tókst að opna lensportin og þá fór seglið með síldinni út fyrir lunninguna. Allt sprakk og þá gat skipstjórinn kippt honum upp. Staðan var ansi skuggaleg og maður hugsaði bara um að bjarga sér. Ég hélt að þetta væri búið en við sluppum.“

Sjá samtal við Guðmund í heild á baksíðu Morgunblaðsins á laugardag.