Norsku eldisrisarnir lögsóttir fyrir meint verðsamráð

Tíu lögsóknir vofa nú yfir nokkrum af stærstu laxeldisfyrirtækjum Noregs og dótturfyrirtækjum þeirra, þar sem þau eru sökuð um verðsamráð.

Helst er um að ræða fyrirtækin Grieg Seafood, Lerøy Seafood Group, Salmar, Bremnes og Mowi, sem áður bar heitið Marine Harvest, auk útflytjandans Ocean Quality.

Lögsóknin sem fyllti tuginn var lögð fram af einstaklingi fyrir héraðsdómstólinn í Maine-ríki 11. júní, en meðal annarra stefnenda eru dreifingaraðilar og veitingastaðir í Flórída, Massachusetts, New York, Ohio, Washington D.C. og Pennsylvaníu.

Réðust til inngöngu í febrúar

Stefnendurnir sækjast eftir greiðslu skaðabóta úr hendi fyrirtækjanna og vísa þeir allir til yfirstandandi verðsamráðsrannsóknar á vegum framkvæmdastjórnar Evrópusambandsins, en fyrstu fregnir af henni voru fluttar í febrúar síðastliðnum á vefmiðlinum Undercurrent News.

Fulltrúar framkvæmdastjórnarinnar höfðu þá þegar ráðist til inngöngu í húsakynni fyrirtækjanna, þar á meðal fiskvinnslu Mowi í Rosyth í Bretlandi.