„Skiptir fyrirtækið miklu máli“

Fyrirtækið Sjótækni ehf. á Tálknafirði hefur staðist öryggisvottun samkvæmt alþjóðlegum staðli ISO-45001 og endurnýjun á umhverfisstaðlinum ISO-14001, eftir að norska vottunarstofan DNV-GL tók út starfsemi þess.

Í tilkynningu frá Sjótækni er bent á að það sé líklega fyrsta útgerðar- og verktakafyrirtæki landsins sem fær báðar þessar vottanir á starfsemi sína.

„Þessi staðfesting skiptir fyrirtækið miklu máli og er jafnframt trygging viðskiptavina okkar á að við séum að sinna okkar störfum sem best verður á kosið,“ segir enn fremur í tilkynningunni.

Sjótækni er hafsækinn verktaki sem sinnir uppsetningu, eftirliti, viðhaldi og þjónustu við ýmiskonar mannvirki í sjó og vatni fyrir fyrirtæki, stofnanir og sveitarfélög ásamt því að reka öfluga köfunarþjónustu.

Framkvæmdir tengjast meðal annars neðansjávarlögnum, mannvirkjum í sjó og vatni, fiskeldi, skipaþjónustu, virkjunum og stóriðju. Fyrirtækið gerir út báta, vinnuskip, pramma og bílaflota og mikið af sérhæfðum tækjum og búnaði, svo sem kafbáta og mælingatæki.

Aðalstarfsstöð fyrirtækisins er á Tálknafirði en hjá því starfa 15 starfsmenn.

• Blogga um frétt