Stormur verður gerður út við Baffinsland

Línu- og netaskipið Stormur HF-294 fór upp í slipp í Reykjavík fyrr í mánuðinum og kom svo aftur niður sem Stormur GR 6-44. Ástæðan er sú að skipið hefur verið selt til kanadísks útgerðarfélags og er kaupverðið 14 milljónir evra, eins og greint var frá á 200 mílum í mars.

„Við erum núna að setja í hann verksmiðjuna, það er millidekkið. Það var aldrei klárað því við vissum ekki hvað átti að gera við skipið,“ segir Axel Jónsson skipstjóri, sem sigla mun skipinu úr landi síðar í ár.

Hann býst við að það verði í október, en í kjölfarið mun útgerðarfélagið vestanhafs gera skipið út til veiða á grálúðu á línu við Baffinsland.

Lá óhreyft í Reykjavíkurhöfn

Skipið kom til Reykja­vík­ur­hafn­ar í des­em­ber 2017 frá Gdansk í Póllandi, þar sem skrokk­ur­inn var lengd­ur úr 23 metr­um í 45 metra. Út­gerðin hafði þá keypt skrokk­inn í Ný­fundna­landi nokkr­um árum áður.

At­hygli vakti þá að skipið er dísil-raf­knúið (e. diesel-electric) þar sem skrúfu­búnaður­inn er knú­inn af raf­mótor. Ork­an er feng­in með dísil-eldsneyti, sem dríf­ur raf­mótor­inn, en með þessu fyr­ir­komu­lagi mun orku­notk­un vera um helm­ingi minni en hjá sam­bæri­legu skipi.

Síðan hef­ur skipið hins veg­ar legið óhreyft í Reykja­vík­ur­höfn.

„Ég seldi kvót­ann og ákvað að hætta í út­gerð og skipið hef­ur síðan þá verið til sölu. En skipið er æðis­legt, frá­bært sjó­skip í alla staði,“ sagði Stein­dór Sig­ur­geirs­son, eig­andi Storms Sea­food, við 200 mílur í mars.

Frétt af mbl.is

Stormur á leið úr landi

• Blogga um frétt