Ísjakinn ógn við skemmtiferðaskip

Borgarísjaka undan Vestfjörðum rekur enn að landi innan um hafís, frosinn sjó. Samkvæmt athugunum jarðvísindamanna við Háskóla Íslands er ísjakinn nú um 28 sjómílum norðvestan af Horni á Hornströndum. Hafísinn, sem umkringir jakann, rekur nú austur.

Í samtali við mbl.is segir Ingibjörg Jónsdóttir, dósent við jarðvísindadeild Háskóla Íslands, að viðbúið sé að brotnað geti upp úr ísjakanum og slíkt geti verið varasamt. Eitthvað er um skipaferðir á svæðinu, fiskiskip sem séu flest hver vön slíkri hættu, og skemmtiferðaskip, sem frekar þurfi að hafa áhyggjur af enda séu þau það síður. 

„Það er helst þegar ísjakinn fer að bráðna sem hann getur verið hættulegur,“ segir Ingibjörg. Jafnvægi getur breyst og litlir jakar geti brotnað frá, sem erfiðara sé að greina á ratsjám skipa. Borgarísjakinn er um 80.000 fermetrar að stærð, á við rúmlega 11 fótboltavelli. Ekki sé þó hægt að greina hversu þykkur hann er.

• Blogga um frétt