Betra hljóð í trillukörlum

Strandveiðibátarnir höfðu í gærmorgun, fyrir síðasta dag strandveiða í júní, landað tæpum 4.669 tonnum af þorski sem er 38,5% af leyfilegum afla í sumar. Er þetta 19% aukning frá sama tíma á síðasta sumri.

Örn Pálsson, framkvæmdastjóri Landssambands smábátaeigenda, telur líkur á að kvótinn dugi fyrir sumarið og afar litlar líkur á að það komi til stöðvunar veiða.

Maí gekk bærilega, sérstaklega fyrir vestan, en bakslag varð í júní vegna ótíðar, að sögn Arnar. Hann hefur eftir trillukörlum á Vestfjörðum að þeir hafi þurft að hafa mikið fyrir því að ná dagskammtinum. Að loknum 13 dögum í júní var aflinn 2.326 tonn sem er 16% aukning frá sama mánuði í fyrra.

Mesti aflinn fyrri helming strandveiðitímabilsins er á svæði A sem Breiðafjörður og Vestfirðir falla undir. Afli á hvern bát er þó heldur minni í júní en á síðasta ári en svipaður þegar tímabilið sem af er vertíð er skoðað. Aflinn á svæði D, frá Hornafirði í Faxaflóa var 481 tonn,á svæði C sem nær frá Eyjafirði til Djúpavogs var aflinn 426 tonn og á svæði B var búið að landa 374 tonnum. Aukning er á öllum svæðum, að því er fram kemur í Morgunblaðinu í dag.