Fyrsti hnúðlax sumarsins kominn á land

Fyrsti hnúðlax sumarsins hefur veiðst í Ölfusá, fyrir landi Hrauns í Ölfusi. Laxinn var 2,4 kg hrygna, sem var vel haldin eftir dvöl sína í sjó, að því er fram kemur á vef Hafrannsóknastofnunar. 

Segir þar að í kjölfar vaxandi gengdar hnúðlaxa í íslenskar ár árið 2017, þegar um sjötíu hnúðlaxar veiddust í ám víðsvegar um landið, megi búast við að talsvert margir hnúðlaxar komi til með að veiðast í sumar.

„Lífsferill hnúðlaxa er stuttur. Þeir hrygna seinni hluta sumars og snemma hausts, jafnan fyrr en okkar laxfiskar. Hrognin klekjast út að vori og ganga til sjávar aðeins nokkurra vikna gömul. Þannig eru í raun aðskildir stofnar í árum með jafna tölu í ártali og oddatölu svo ekki verður blöndun á milli þeirra,“ segir á vef stofnunarinnar.

Drepast að lokinni hrygningu

„Árgangurinn á oddatölu ári er jafnan stærri. Hnúðlaxar drepast allir að lokinni hrygningu og því verður stundum vart við úthrygnda fiska síðsumars.“

Fyrsti hnúðlaxinn veiddist hér á landi 1961 og hefur þeirra orðið vart í litlum mæli flest ár síðan sem villufisk úr sleppingum. Smám saman hefur hnúðlax náð að dreifa sér og hefur myndað stofna í ám í Rússlandi og norðurhluta Noregs.

Hafrannsóknastofnun safnar upplýsing um veidda hnúðlaxa. Mikilvægt er að veiðimenn sem veiða hnúðlaxa skrái þá í veiðibækur og komi upplýsingum um þá til Hafrannsóknastofnunar. 

• Blogga um frétt