Árni Friðriksson farinn í leiðangur

Rannsóknaskipið Árni Friðriksson er farið úr höfn til þátttöku í fjölþjóðlegum uppsjávarvistkerfisleiðangri í norðurhöfum, sem farinn er árlega að sumarlagi.

Þetta er tíunda árið í röð sem Hafrannsóknastofnun tekur þátt í leiðangrinum ásamt skipum frá Noregi, Færeyjum, Grænlandi og Danmörku, en í fyrsta skipti er hægt að sjá staðsetningu og feril flestra skipanna á slóðinni: skip.hafro.is.

Í leiðangrinum verður aflað gagna sem nýtast við fjölbreyttar rannsóknir sem snúa að vistkerfisþáttum frá frumframleiðni sjávar til útbreiðslu hvala, að því er fram kemur á vef stofnunarinnar.

Gögnum er safnað fyrir 21 mismunandi rannsóknaverkefni, þar af fjögur ný. Meðal nýju verkefnanna eru fitumælingar á makríl og söfnun á erfðaefni úr íslenskri sumargotssíld.

Leiðangurinn stendur í 30 daga og verða sigldar um 5.900 sjómílur eða tæplega 11 þúsund kílómetrar. Um borð eru sjö vísindamenn og 17 manna áhöfn. Eins og í fyrra mun leiðangursfólkið halda úti bloggi þar sem hægt verður að fylgjast með því sem fram fer um borð í rannsóknaskipinu. Bloggið er á slóðinni: pelagicecosystemsurvey.wordpress.com.

• Blogga um frétt