Pressan á áhafnir meiri en ella

„Það hefur verið mjög góður gangur í veiðunum, jafnt hjá frystitogurunum sem og ísfisktogurunum. Til marks um það get ég nefnt að frystitogararnir þrír voru með 1.200 milljón króna aflaverðmæti í júnímánuði og aflaverðmæti Örfiriseyjar RE í síðustu tveimur túrum, á alls 77 úthaldsdögum, nam einum milljarði króna.“

Þetta er haft eftir Birki Hrannari Hjálmarssyni, útgerðarstjóra togara HB Granda, á vef útgerðarinnar.

„Það hefur einnig gengið mjög vel hjá ísfisktogurunum. Við erum bara með tvo ísfisktogara í rekstri nú þegar Engey RE er farin og Helga María AK er í leiguverkefni á Grænlandi,“ segir Birkir.

„Pressan á áhafnir Akureyjar AK og Viðeyjar RE er því meiri en ella en við erum búnir að stilla því þannig upp að ísfisktogararnir munu landa þrisvar sinnum í viku. Þeir voru með 1.550 tonna afla í júnímánuði og það verður ekkert slegið af í vinnslunni.“

• Blogga um frétt