Tekur fréttunum með fyrirvara

Áform nígerskra stjórnvalda um að lækka innflutningstolla á þurrkuðum þorskhausum úr 20% í 10% eru uppi á borðinu og myndu umræddar lækkanir koma sér vel fyrir íslenska útflytjendur í geiranum.

Í norska sjávarútvegsmiðlinum Fiskeribladet er sagt frá umræddri tollalækkun en í samtali við Morgunblaðið segir Víkingur Þórir Víkingsson, framkvæmdastjóri fiskþurrkunarfyrirtækisins Haustaks, að hann hafi fengið tilkynningu um þessar áætlanir en þær hafi þó ekki enn komið til framkvæmda. Gjarnan þurfi að taka fréttum sem þessum með fyrirvara.

Myndi hjálpa mikið

„[Nígeríumenn] hafa verið að tala um þetta og gefa þetta út, en þetta er ekki komið í gegn. Því miður,“ segir Víkingur í umfjöllun um mál þetta í Morgunblaðinu í dag og segist hafa fengið bréf með tilkynningu frá Nígeríu um umrædd áform. Hann hafi í kjölfarið haft samband við sitt fólk þarlendis og fengið upplýsingar um að ófá viðlíka bréf hefðu áður verið send út, án þess að þeim fylgdi endilega tollalækkun.