Meira er af makríl

Búið var að landa yfir 42 þúsund tonnum af makríl í gær í júlí og það sem af var ágúst, samkvæmt aflaupplýsingum á vef Fiskistofu. Á sama tímabili í fyrra var búið að landa rúmlega 28 þúsund tonnum. Þessar tölur eru birtar með fyrirvara um mögulegar breytingar.

Sex skip frá Færeyjum, Grænlandi, Íslandi og Noregi könnuðu ástand og útbreiðslu makríls, síldar, kolmunna og fleiri uppsjávartegunda ásamt ástandi vistkerfisins í Norður-Atlantshafi í júní sl.

Í frétt norsku hafrannsóknastofnunarinnar í gær kom m.a. fram að mikið af makríl hafi fengist norðarlega og á norðvesturhluta útbreiðslusvæðisins samanborið við fyrri ár. Makríllinn var kominn alveg norður á 78°N, vestan við Longyearbyen á Svalbarða. Nyrst á könnunarsvæðunum fékkst metafli af makríl. Meðalþyngd makrílsins var frá 214 grömmum syðst upp í 609 grömm nyrst sem staðfestir að stærsti makríllinn gengur lengst til norðurs. Lítið fékkst af makríl með Noregsströndum og austarlega í Norskahafi og vestast í Barentshafi. Norsk vorgotssíld sást nú norðarlega í Norskahafi en þar hafði hún ekki sést lengi.