Ostrubændurnir þurfa að hætta rækt

Ostruræktarfyrirtækið Víkurskel mun þurfa að leggja upp laupana ef ákvörðun Umhverfisstofnunar um að fyrirtækið megi ekki flytja inn ostrur til áframræktunar verður lokaniðurstaðan.

Þetta segir Kristján Phillips hjá Víkurskel í samtali við Morgunblaðið en eins og greint var frá í Morgunblaðinu í gær var umsókn fyrirtækisins um innflutning á milljón smáostrum frá Spáni til áframræktunar í Skjálfandaflóa hafnað. Var ástæðan fyrir höfnuninni m.a. ágengni tegundarinnar, smithætta af hennar völdum og frjósemi hennar.

Kristján segir að Víkurskel standi nú í því að reyna að skoða stöðu sína, og sjá hvað hægt sé að gera, en að öllu óbreyttu muni fyrirtækið þurfa að hætta starfsemi innan fárra ára.

„Við erum bara að skoða hvað við ætlum að gera,“ segir Kristján og segir rökin sem Umhverfisstofnun færir fyrir niðurstöðu sinni ekki vera rétt. Eins og kemur fram í úrskurðinum deildu Umhverfisstofnun og Víkurskel m.a. um hvort möguleiki væri á að ostrutegundin gæti fjölgað sér í sjónum við Ísland. Sagði Víkurskel að það væri útilokað, enda væri sjórinn hér of kaldur, en Umhverfisstofnun taldi það ekki útilokað, og var það meðal ástæðna þess að umsókninni var hafnað. „Þetta er bara reist á einhverjum rökum sem við skiljum ekki.“

Segir Kristján að ostrurnar sem um ræðir séu þær sömu og fyrirtækið hefur flutt inn seinustu ár.