Reyna að bjarga grindhvölum við Ólafsvík

Fjóra hvali rak á land í fjöru við Ólafsvík í kvöld. Stærðarinnar grindhvalavaða, sem telur líklega um hundrað hvali, er á sveimi um 100-200 metra frá ströndinni. Þrír hvalanna sem rak á land náðu að komast af sjálfsdáðum aftur á haf út en einn virðist vera að drepast í flæðarmálinu. 

Kristinn Jónasson, bæjarstjóri í Snæfellsbæ, var í fjörunni í kvöld. „Það er voða lítið hægt að gera held ég, það er töluverður vindur. Hvalurinn veltist bara undan bárunni og nær ekki að koma sér út. Það sem er kannski mesta ógnin er að vaðan virðist alltaf færast nær landi,“ segir Kristinn í samtali við mbl.is. 

Hópur fólks hefur reynt að bjarga hvalnum um tíma, en ekki haft erindi sem erfiði. Fréttaritari mbl.is á Vesturlandi telur að um erlenda ferðamenn sé að ræða. 

Grind­hvala­vöður hafa leitað nærri strönd­um Íslands á Suðvest­ur- og Vest­ur­landi í aukn­um mæli upp á síðkastið en á milli 50 og 60 hval­ir strönduðu í fjör­unni við Útskála­kirkju í Garði í byrjun mánaðarins. 

Grindhvalavöður hafa sést í grennd við Ólafsvík í sumar. „Fyrir þremur vikum var ein úti í Rifi, um 150 talsins, og þá komu menn á sæþotum og ráku þá út,“ segir Kristinn. 

Viðbragðsaðilar hafa ekki verið kallaðir út vegna vöðunnar, enn sem komið er.