Stökkpallur inn á Bandaríkjamarkað

Það kviknaði á peru hjá Ólafi Matthíassyni þegar hann las viðtal í Morgunblaðinu við saltframleiðanda sem barmaði sér yfir því hve risastórt skref það getur verið fyrir lítil íslensk framleiðslufyrirtæki að taka stökkið út á erlendan markað. Hefur aðeins verið um tvennt að velja: að senda vörur frá Íslandi með pósti, sem væri dýrt og lengdi sendingartímann, eða þá að koma upp vöruhúsi með ærnum tilkostnaði.

„Það er líka inni í myndinni að komast hjá stærri vöruhúsum, en þar þurfa framleiðendur að vera búnir að ná allt annarri stærð og ekkert sem heitir að ætla að þreifa aðeins á markaðinum og sjá viðbrögðin áður en allt er lagt undir.“

Ólafur hefur um árabil stýrt flutningafyrirtækinu North Atlantic Cargo Line, sem sinnir flutningum á milli N-Ameríku og Evrópu, og hafði aðgang að rúmgóðu vöruhúsi í Virginíu. Hann kom auga á hvernig mætti útvíkka reksturinn, íslenskum sprotum til framdráttar, og nýta aðstöðuna til að opna vöruhús og dreifa þaðan pöntunum til kaupenda vítt og breitt um Bandaríkin. Nú er þessi viðskiptahugmynd orðin að sjálfstæðu fyrirtæki sem fengið hefur nafnið Ísafold Distribution Center (www.isafolddc.com).

Samhliða því var ákveðið að flytja starfsemina frá Virginíu til Portland í Maine, þar sem flutningaskip Eimskips leggjast að bryggju vikulega, og opna þar nýtt vöruhús með aðstöðu til að meðhöndla kæli- og frystivörur. Sonur Ólafs, Alexander, er framkvæmdastjóri Ísafoldar og flutti frá Los Angeles til Portland til að taka þátt í verkefninu.

Ítarlegri umfjöllun má finna í ViðskiptaMogganum, sem fylgdi Morgunblaðinu 7. ágúst.