„Íslendingar eru gráðugir og óábyrgir“

Formaður fiskveiðinefndar Evrópuþingsins, Chris Davies, segir makrílstríð við Ísland ógna framtíð skoskra sjómanna. 

Davies, sem er Evrópuþingmaður Frjálslyndra demókrata í Bretlandi, er staddur í Skotlandi. Í umfjöllun The Shetlands Times um heimsóknina er fjallað um sjálfbærar makrílveiðar skipa frá Evrópusambandinu, Noregi, Íslandi og Grænlandi. Þar segir einnig að á síðasta ári hafi sérfræðingar Alþjóðahafrannsóknarráðsins (ICES) lýst því yfir að makrílstofninn sætti ofveiði og því hafi verið samþykkt að minnka veiðar um 20%. 

Fullyrt er í frétt The Shetland Times að íslensk stjórnvöld sæti gagnrýni fyrir að hafa tilkynnt að kvóti Íslands verði aukinn úr tæpum 108 þúsund tonnum í rúm 140 þúsund tonn, án nokkurs samráðs. Morgunblaðið greindi frá því fyrr í sumar að Íslend­ing­ar taka sér stærri hlut af mak­rílafl­an­um í Norður-Atlants­hafi en þeir hafa áður gert og að heildaraflinn á makríl færi um 80 þúsund tonn yfir ráðgjöf vísindamanna. 

Frétt af mbl.is

Aukið við makrílkvótann

Davies ræddi við forystumenn úr sjávarútvegi í heimsókn sinni til Hjaltlandseyja og sagði hann meðal annars að ef veiða á fiskistofna með sjálfbærum hætti sé nauðsynlegt að hafa samráð milli þjóða. „Íslendingar eru gráðugir og óábyrgir. Þeir haga sér ekki eins og vinaleg þjóð, hvað þá eins og þjóð sem á aðild að Evrópska efnahagssvæðinu,“ hefur miðillinn eftir Davies, sem vill taka málið upp á Evrópuþinginu.

• Blogga um frétt