Gat kom á nótarpoka einnar sjókvíar Arnarlax við Laugardal í Tálknafirði fyrr í mánuðinum og barst Matvælastofnun tilkynning um þetta á föstudag.

Uppgötvaðist gatið við þrif og er viðgerð lokið, að því er segir á vef stofnunarinnar. Samkvæmt upplýsingum fiskeldisfyrirtækisins hafi gatið verið um 7 sentimetrar að hæð og 12 sentimetrar að breidd, en 179 þúsund laxar voru í kvínni og var meðalþyngd þeirra 280 grömm.

„Við köfunareftirlit sem átti sér stað fyrr í þessum mánuði, eða 6. ágúst sl., var nótarpoki heill,“ segir á vef stofnunarinnar.

Atvikið sé þar til meðferðar og muni eftirlitsmenn skoða aðstæður hjá fyrirtækinu og fara yfir viðbrögð þess.

Bent er á að Arnarlax hafi lagt út net í samráði við Fiskistofu til að kanna hvort slysaslepping hefði átt sér stað. Netanna hafi verið vitjað bæði á laugardag og sunnudag og enginn lax veiðst. Því hafi síðan verið hætt. 

Tengdar fréttir

Fiskeldi

„Þetta er metnaðarfullt frumvarp“

• Beint: Lagareldisfrumvarpið kynnt
• Heldur kynningarfund um eldisfrumvarp
• Ótímabundin leyfi verði líklega ekki gefin út
• Sjókvíaeldi stefnir í átt að samþættri hringrás

» Fleiri tengdar fréttir

• Blogga um frétt