„Höfum elt makrílinn í allar áttir“

„Það hefur allt gengið að óskum. Aflinn er yfirleitt mjög góður en það kemur fyrir að hann detti niður í nokkra klukkutíma inn á milli. Það er mikil ferð á makrílnum en það er engu líkara en að hann gangi í hringi þegar hann er kominn þarna út,“ segir Albert Sveinsson, skipstjóri á Víkingi AK.

Skipið er nú í höfn á Vopnafirði en þangað kom skipið um klukkan 20 í gærkvöldi með 820 tonn af makríl, að því er fram kemur á vef Brims. Aflinn fékkst í fimm holum í svokallaðri Síldarsmugu, djúpt austur af landinu.

„Við höfum elt makrílinn í allar áttir og þegar við hættum veiðum var hann á hraðri leið í vesturátt. Við vorum þá komnir á sömu slóðir og við hófum veiðarnar á,“ segir Albert.

Aldrei að vita nema einhver hitti á góða göngu

Að hans sögn er örugglega eitthvað að bætast við makrílgönguna í Síldarsmugunni.

„Við merkjum það meðal annars á stærðinni á fisknum. Í síðasta túr var makríllinn allur af svipaðri stærð og við vorum lengst af að veiða við Suðausturland eða ríflega 500 grömm.

Í þessum túr var fiskurinn heldur smærri eða um 460 grömm að jafnaði. Á heimsiglingunni lóðaði svo á makríl í íslenskri landhelgi og það er aldrei að vita nema einhver hitti á góða göngu á útstíminu á næstunni.“

• Blogga um frétt