Landaði makríl úr Smugunni

Hoffell SU 80 er búið að veiða um 7.000 tonn af makríl á þessari vertíð. Það er mun betri veiði en á sama tíma í fyrra, að því er segir á heimasíðu Loðnuvinnslunnar á Fáskrúðsfirði sem gerir skipið út.

Aðfaranótt sunnudags landaði Hoffellið um 1.000 tonnum af makríl í heimahöfn. Aflinn fékkst sunnarlega í Smugunni sem er alþjóðlegt hafsvæði í Barentshafi austan við Svalbarða. Þangað er um 22 klukkustunda sigling frá Fáskrúðsfirði.

Sigurður Björnsson, skipstjóri á Hoffellinu, sagði að helsta ástæða betri aflabragða nú væri að makrílveiðin í íslensku lögsögunni hefði verið betri en í fyrra og að fiskurinn hefði verið miklu fyrr á ferðinni í sumar. Hann sagði að almennt hefði veiðin í Smugunni verið góð. Hoffellið stefndi aftur þangað að löndun lokinni. Makríllinn sem fékkst norður í Barentshafi var á bilinu 440 til 480 grömm, ekki alveg jafn góður og sá sem veiddist í íslensku lögsögunni. Sigurður sagði Hoffellið vera fínt skip og áhöfnina mjög góða. gudni@mbl.is