Kristján Þór Júlíusson sjávarútvegs- og landbúnaðarráðherra telur ólíklegt að fiskveiðinefnd Evrópuþingsins grípi til viðskiptaþvingana gegn Íslandi og Grænlandi vegna makrílveiða. Hann segir það ekki í höndum einstakra þingmanna Evrópuþingsins að hóta slíku.

Nær lagi væri að Noregur, Færeyjar og Evrópusambandið breyttu um aðferðir og byðu Íslendingum að taka þátt í ákvörðunum um úthlutun. „Það er með öllu óréttmætt og ég læt ekki bjóða okkur Íslendingum það að gerð sé krafa á eitt ríki að draga einhliða úr veiðum á sameiginlegum veiðistofni,“ segir Kristján í umfjöllun um makrílveiðarnar í Morgunblaðinu í dag.

Chris Davies, formaður fiskveiðinefndar Evrópuþingsins, segist vonast til að hitta fulltrúa íslenskra stjórnvalda áður en fiskveiðinefndin ræðir mögulegar viðskiptaþvinganir.

Hann var spurður af hverju hótanir um viðskiptaþvinganir beindust eingöngu að Íslendingum og Grænlendingum en ekki Rússum: „Þótt Ísland sé sjálfstætt strandríki er það einnig aðili að EES og sannast sagna myndi ég vonast eftir betra og nánara sambandi milli Evrópusambandsins og Íslands en vænta mætti við Rússland. Mér er sagt að Ísland selji fisk til Rússlands á meðan ESB heldur uppi refsiaðgerðum til að mótmæla ólögmætri innlimun á hluta af öðru landi. Það er auðvitað Íslands að móta sína stefnu og að líkindum mun það selja viðbótarmakrílinn sem áætlað er að veiða með sama hætti.“

Tengdar fréttir

Makrílveiðar

130 þúsund tonna upphafskvóti í makríl

• Fá að færa 25% makrílkvótans á næsta ár
• Eining um heildarkvóta en ekki skiptingu
• Leggur til 22% lækkun á makrílveiðum
• Útbreiðsla makríls í íslenskri landhelgi ein sú minnsta

» Fleiri tengdar fréttir