Seiði í Tálknafjörð með nýjum leyfum

Arctic Fish hefur endurheimt leyfi til að ala lax í sjókvíum í Patreksfirði og Tálknafirði. Fyrstu seiðin samkvæmt nýju leyfunum voru sett í kvíar í Tálknafirði í gær.

Leyfi Arctic Fish og Arnarlax til aukningar laxeldis í Patreksfirði og Tálknafirði voru felld úr gildi í september á síðasta ári með úrskurði úrskurðarnefndar umhverfis- og auðlindamála. Var ágalli talinn á umhverfismati fyrirtækjanna.

Vegna þeirrar stöðu sem upp var komin var lögfest heimild til ráðherra sjávarútvegsmála að veita fyrirtækjum bráðabirgðaleyfi, að uppfylltum skilyrðum, með sama hætti og umhverfisráðherra hafði til að gera í sínum málaflokki, að því er fram kemur í umfjöllun um mál þetta í Morgunblaðinu í dag.