80% meiri makríll í ár

Á hafsvæðinu við Ísland mælist nú 80% meira af makríl en 2018. Mestur var þéttleikinn sunnan og vestan við landið, líkt og verið hefur undanfarin ár.

Þetta er niðurstaða sameiginlegs uppsjávarleiðangurs Íslendinga, Grænlendinga, Færeyinga, Norðmanna og Dana sem farinn var á tímabilinu 28. júní til 5. ágúst 2019. Meginmarkmið leiðangursins var að meta magn uppsjávarfisks í Norðaustur-Atlantshafi að sumarlagi.

Í umfjöllun um mál þetta í Morgunblaðinu í dag segir Þorsteinn Sigurðsson, sviðstjóri uppsjávarlífríkis hjá Hafrannsóknastofnun Íslands, þessa fjölgun makríls helgast að miklu leyti af árgangaskipan. „Það eru stærri árgangar að koma inn. Svo er það auðvitað þannig þegar þú ert með svona mælingu að þá eru sveiflur sem eru ekki beintengdar stofnstærðum heldur hvernig þú hittir í þetta,“ segir Þorsteinn. „Stóri þátturinn eru þessir sterku árgangar 2016 og 2017 sem eru við Noreg. Það voru vísbendingar um að þeir yrðu góðir.“